Այսօր՝ հունվարի 26-ին, արտակարգ իրավիճակ է ստեղծվել Վանաձոր-Դիլիջան ավտոճանապարհին։ Ինչպես դեպքի վայրից հայտնում է Shamshyan.com-ը, պատճառը ճանապարհի մերկասառույցն է, ինչի հետևանքով էլ մոտ 20 կմ-անոց ճանապարհահատված ավտոմեքենաները, այդ թվում՝ բեռնատարները, չեն կարողանում երթևեկել։
Գրեթե լարված են աշխատել ՀՀ Ներքին գործերի նախարարության Ոստիկանության Պարեկային ծառայության Լոռու մարզի գումարտակի պարեկները՝ գումարտակի հրամանատար Արմեն Բեժանյանի, գումարտակի ծառայության ավագ տեսուչ Արման Սուքիասյանի և ՀՀ ՆԳՆ փրկարար ծառայության Լոռու մարզի փրկարարական վարչության օպերատիվ խումբն ու հրշեջ-փրկարարական ջոկատների փրկարարները։
ՀՀ ՆԳՆ ոստիկանության Լոռու մարզային վարչության պետ Արթուր Զաքարյանի հանձնարարականով տեղում նաև ուժեղացված ծառայության են անցել ոստիկանության Տարոնի և Բազումի բաժինների համայնքային ոստիկանության բաժանմունքների ծառայողները և հենց ոստիկանների, պարեկների, փրկարարների շնորհիվ է, որ նշված հատվածում ճանապարհատրանսպորտային ոչ մի պատահար տեղի չի ունեցել։
Միայն ժամեր անց իրավիճակի մասին տեղեկանում է Լոռու մարզպետ Արամ Ղազարյանը, ում հանձնարարականով էլ դեպքի վայր է ժամանում փոխմարզպետը, ով փորձում էր հեռախոսով կապվել ճանապարհն սպասարկող ընկերության պատասխանատուների հետ, որպեսզի նրանք բարեհաճեն ու մերկասառույց ճանապարհը մշակեն աղ ու ավազով, իսկ այդ ընթացքում վարորդներն ու քաղաքացիները իրենց շնորհակալանքի խոսքերն էին ուղղում պարեկներին, փրկարարներին, ոստիկաններին, իսկ ճանշինականներին ուղղում էին, ժողովրդի լեզվով ասած, «յոթ բալանոց քաղցր խոսքեր»։
Այս պահին պարեկները, փրկարարներն ու ոստիկանները նշված հատվածում շարունակում են ծառայությունը, իսկ Վանաձորից դեպի Դիլիջան՝ Դիլիջանի վարչական տարածքում ճանշինականները ոչ միայն օպերատիվ են գործել, այլ նաև ճանապարհը մշակել են աղ ու ավազով և տեղում Տավուշի մարզի պարեկների, Դիլիջանի փրկարարների հետ իրականացնում են հերթապահություն։
