Oragir.News-ի հետ զրույցում իրանագետ, ԵՊՀ իրանագիտության ամբիոնի վարիչ Վարդան Ոսկանյանն ընդգծեց, որ Իրանի բարձրաստիճան ցանկացած պաշտոնյայի այցը Հայաստան կարևոր է՝ հաշվի առնելով Արցախյան 44-օրյա պատերազմից և Արցախի ամբողջական բռնազավթումից հետո ստեղծված մարտահրավերները։

Նա նշեց, որ իրանական կողմն ապահովում է ՀՀ-ի անվտանգության ճարտարապետության կարևոր բաղադրիչներից մեկը՝ մասնավորապես զսպում է Բաքվի բարբարոսական վարչախմբի ախորժակը, որը նկրտումներ ունի ոչ միայն բռնազավթված Արցախի, այլ նաև Հայաստանի Հանրապետության տարածքի նկատմամբ։

Վարդան Ոսկանյանն ուշադրություն հրավիրեց այն բանին, որ այցի ընթացքում վերջնականացվեց Իրանի Թավրիզ քաղաքում Հայաստանի Հանրապետության գլխավոր հյուպատոսության բացման հարցը, որը ՀՀ-ին սահմանակից Իրանի պատմական Ատրպատականի նահանգի կենտրոնն է, և շատ կարևոր է այնտեղ ներկայություն ունենալը՝ հաշվի առնելով այն հանգամանքը, որ Ադրբեջանը նկրտումներ ունի Իրանի այս երկրամասի նկատմամբ։

Նրա խոսքով՝ թեև Ատրպատականը բնակեցված է թյուրքախոս իրանցիներով, սակայն վերջիններս չեն կարող ադրբեջանցիներ համարվել։

Մեր զրուցակիցը շեշտում է՝ ադրբեջանա-թուրքական դաշինքը չի հրաժարվել այսպես կոչված «Զանգեզուրի միջանցք»-ից, որքան էլ հայտարարի, որ հետաքրքրված չէ այս նախագծով, և ՀՀ-ի փոխարեն այն կարող է իրականացվել Իրանի տարածքով։

Իրանագետի խոսքով՝ իրանցիներն այս հարցում շատ հետաքրքիր տրամաբանությամբ են աշխատում՝ մի կողմից զսպում են ՀՀ ինքնիշխան տարածքի որևէ հատվածի նկատմամբ առկա հավակնությունները, իսկ մյուս կողմից՝ Ադրբեջանից Նախիջևան տրանսպորտային փոխադրումներին համար տրամադրում են իրենց տարածքը։

Մանրամասները՝ Oragir.News-ի տեսանյութում

The post ՀՀ-ն և Իրանը մարտահրավերներ ունեն. Աբդոլլահիանի ակնարկը appeared first on Social Blog.