Պարեկային ծառայությունը Հանրապետության հրապարակից անցավ ուժեղացված ծառայության
Shamshyan.com-ը գրում է․ Այսօր՝ դեկտեմբերի 31-ին, ՀՀ Ներքին գործերի նախարար Վահե Ղազարյանի, ՀՀ ոստիկանության պետ, Ներքին գործերի նախարարի տեղակալ, ոստիկանության գեներալ մայոր Արամ Հովհաննիսյանի կարգադրությունները Երևանի Հանրապետության հրապարակում ՀՀ ՆԳՆ ոստիկանության պարեկային ծառայության, ոստիկանության գնդապետ Արթուր Խուդինյանը փոխանցեց ուժեղացված ծառայության անցնող ՀՀ ՆԳՆ ոստիկանության պարեկային ծառայության Երևան քաղաքի գնդի պարեկներին։
Ինչպես հայտնում է ֆոտոլրագրող Գագիկ Շամշյանը, Ա․ Խուդինյանն իր խոսքում նշեց, որ տոնական օրերին հասարակական անվտանգության ապահովման նպատակով Ներքին գործերի նախարարության ոստիկանությունը, այդ թվում պարեկային ծառայությունը անցել են ուժեղացված ծառայության։
Տոնական օրերին շատերը կկազմակերպեն հրավառություններ, հրագործական արտադրատեսակներ օգտագործելիս քաղաքացիները պետք է պահպանեն անվտանգության և համակեցության կանոնները, իսկ այն քաղաքացիները, ովքեր լռության ժամին խախտում կանեն, այն է՝ ժողովրդի լեզվով ասած «սալյուտներ բաց կթողնեն», կենթարկվեն վարչական պատասխանատվության։
Պարեկները շուրջօրյա պետք է իրականացնեն ճանապարհային երթևեկության անվտանգության ու հասարակական կարգի անվտանգության ապահովման միջոցառումներ։
Օգտվելով առիթից՝ Ա․ Խուդինյանը կոչ է անում վարորդներին ու հետիոտներին, որպեսզի ճանապարհային երթևեկության նկատմամբ դրսևորեն պատասխանատու մոտեցում և հիշեն՝ իրենց տանը սպասող կա։
ՊԾ Երևան քաղաքի գնդի հրամանատար Անդրանիկ Իսախանյանը Ա․ Խուդինյանին ներկայացրեց, որ պարեկները պատրաստ են անցնելու ուժեղացված ծառայության և անհանդուրժող են լինելու այն վարորդների նկատմամբ, ովքեր կլինեն ոչ սթափ։
Նրանք օրենքի ողջ խստությամբ ենթարկվելու են վարչական պատասխանատվության։
ՊԾ պետ Ա․ Խուդինյանն ու ՊԾ Երևանի գնդի հրամանատար Ա․ Իսախանյանը պարեկային ծառայողների անունից շնորհավորում են հայ ժողովորդի Ամանորն ու Սուրբ ծնունդը՝ ցանկանալով անվտանգ ու ապահով երթևեկություն։
