Ցերեկային քնկոտությունը կապված է սրտի կաթվածի վտանգի հետ. մանրամասներ
Օրվա ընթացքում քնկոտություն զգացող կանանց մոտ, հնարավոր է, առկա են սրտի թաքնված խնդիրներ, որոնք բարձրացնում են սրտի եւ ուղեղի կաթվածի վտանգը։ Այսպիսին են ամերիկյան նոր հետազոտության տվյալները։
Ուսումնասիրելով ավելի քան 84 000 ամերիկացի կանանց տվյալները՝ հետազոտողները ցերեկային քնկոտությունը կապել են սրտանոթային հիվանդությունների կրկնակի ռիսկի հետ, հաղորդում է Newsmax Health-ը։
«Մենք մտածում էինք, որ, ամենայն հավանականությամբ, ցերեկային քնկոտությունը կապված է ոչ բավարար չափով քնելու, գիշերային հերթափոխով աշխատելու, քնի ընթացքում խռմփացնելու եւ այլ պատճառների հետ, որոնք ինքնին կապված են նյութափոխանակության խանգարումների (օրինակ՝ շաքարախտի) հետ։ Եվ դրանք հանդիսանում են սրտի եւ ուղեղի կաթված առաջացնող վտանգավոր գործոններ», – ուսումնասիրության գլխավոր հեղինակ Ջեյմս Գանգվիչը ասել է Reuters Health-ին։
Գանգվիչը ղեկավարել է Նյու Յորքում Կոլումբիայի համալսարանի բժիշկների եւ վիրաբույժների քոլեջի հետազոտությունը։
Նա եւ իր համահեղինակները վերլուծել են 84 003 կանանց տվյալները 2001 թ.- ից մինչեւ 2009թ.։ Առաջին տարում կանայք պատասխանել են քնի տեւողության, բնականոն քնի խախտումների, քնի ընթացքում խռմփացնելու եւ հերթափոխով աշխատելու մասին հարցերին։
Մինչ 2009թ.՝ երկու տարին մեկ, հետազոտողները արձանագրել են բոլոր գործոնները՝ հերթափոխով աշխատանքը, ասպիրինի օգտագործումը, արյան բարձր ճնշումը եւ այլն։
Այդ ժամանակաշրջանում 500 կանանց մոտ արդեն ախտորոշվել է կաթված։
Կանայք, ովքեր հայտնել են, որ գրեթե ամեն օր քնկոտություն են զգում ցերեկային ժամերին, մոտ երեք անգամ ավելի շատ հակված են եղել կաթվածի։
Կանայք, ովքեր հաճախ են քնկոտություն զգացել, ավելի հակված են ունենալ արյան բարձր ճնշում, շաքարախտ, բարձր խոլեստերին, գիրություն եւ դեպրեսիա։
«Լավ քնեք գիշերը՝ հետեւելով քնի հիգիենայի համար առաջարկվող այն սովորական կանոններին, ինչպիսին է կանոնավոր գրաֆիկի պահպանումը, որը թույլ է տալիս քնել որքան հարկ է՝ ստեղծելով հարմարավետ միջավայր քնելու համար՝ մթություն, ճիշտ ջերմաստիճան եւ խոնավություն», – խորհուրդ է տալիս Գանգվիչը։ «Կատարեք վարժանքներ, բայց ոչ քնելուց առաջ»։
«Մարդիկ, ովքեր օրվա ընթացքում միշտ ցանկանում են քնել, պետք է դիմեն բժշկի», – ասում է նա։
